കവിത

മാസ്കിട്ട സുന്ദരി 

ഉണ്ണികൃഷ്ണൻ മുതുകുളം

••

അസ്തമയസൂര്യൻ മറഞ്ഞിട്ട് 

നാലു നാഴിക കഴിഞ്ഞു..

ആദ്യമായി കാണുകയാണ്, 

മുന്നിൽ ഈ രൂപത്തിൽ 

ഒരു സുന്ദരിയെ... !!

ഒറ്റനോട്ടത്തിൽ വെണ്ണക്കൽ പ്രതിമ.. 

വീണ്ടും നോക്കിയപ്പോൾ 

കറുത്ത മാസ്കിട്ടിരിക്കുന്നു... 

ആഭരണങ്ങളൊന്നുമില്ല... 

കാതിൽ കമ്മൽത്തുളകൾ മാത്രം.. !!

മൂക്കുത്തിയും... 

ഊരിപ്പോയിരിക്കുന്നു.. !

ചിരിക്കുകയാണോ? 

കരയുകയാണോ? 

മാസ്ക് എല്ലാം ഒളിപ്പിക്കുന്നു..!!

ത്വരയുണർത്തുന്ന കവാടങ്ങളെല്ലാം 

നീല ഗൗൺ കൊണ്ട് 

മൂടപ്പെട്ടിരിക്കുന്നു... 

അത്  ഇരുണ്ട മേഘം പോലെ... 

ചുണ്ട് പൊട്ടിയിട്ടുണ്ട്.. !!

കൈത്തണ്ടയിൽ വയലറ്റ് മറുക്... 

ഇരുകവിളിലും നുണക്കുഴി... 

ചിരി മാഞ്ഞിട്ടില്ല.. !

നീല ഗൗൺ കുടുക്കുകൾ, 

വീണ്ടും, 

നേരെയാക്കി.... 

ഇനിയുമുണ്ട് നേരം വെളുക്കാൻ.. 

ആസക്തിയുടെ, സ്നിഗ്ദ്ധത 

പകർന്ന, 

ടേബിളിൽ തന്നെ ഉറങ്ങട്ടെ.. 

കീറി മുറിക്കാനുള്ള സുന്ദര ഗാത്രം.. !!!

■

ഉണ്ണികൃഷ്ണൻ മുതുകുളം

..............................................

പ്രമുഖ ആനുകാലികങ്ങളിൽ അരനൂറ്റാണ്ടായി എഴുതിവരുന്നു. എഴുതാൻ പറ്റാത്ത ചിലത്, വെപ്പാട്ടി തുടങ്ങി പത്തോളം പുസ്തകങ്ങൾ. പ്രധാന അദ്ധ്യാപകനായി ഔദ്യോഗിക ജീവിതം